Fleire knivstukne på tog i England – NRK Norge – Oversikt over nyheter fra ulike deler av landet

Saka oppsummert:

Politiet i Cambridgeshire handterer ei alvorleg hending etter fleire knivstikkingar på eit tog
Toget blei stoppa i Huntingdon, der to menn blei arresterte
Fleire personar er skadde og frakta til sjukehus, men omfanget av skadane er uklart
Over 30 væpna politibetjentar er på staden, og togtrafikken i området er stansa

Oppsummeringa er laga av ei KI-teneste frå OpenAI. Innhaldet er kvalitetssikra av NRK sine journalistar før publisering.

Toget blei stoppa i Huntingdon.

Der blei to menn pågripne av politiet. Identiteten til gjerningspersonane er ikkje kjent.

– Vi handterer for augneblinken ei hending på eit tog til Huntingdon der fleire personar har blitt knivstukne, skriv British Transport Police på X.

Fleire personar er frakta til sjukehus.

Kartet viser Huntington der toget blei stoppa.

Det er uklart kor mange personar som blei knivstukne, og kor alvorlege skadane er.

Over 30 væpna politibetjentar jobbar på staden.

London North Eastern Railway opplyser at togtrafikk rundt Huntingdon stasjon er stansa.

Desse toglinjene er råka:

London North Eastern Railway varslar at følgande toglinjer vil bli enten innstilt eller forsinka med opptil 60 minutt som følge av hendinga:

Avanti West Coast mellom London Euston og Manchester Piccadilly
CrossCountry mellom Sheffield / Doncaster / Leeds / York og Newcastle / Edinburgh
Greater Anglia mellom London Liverpool Street og Stevenage / Peterborough
Great Northern og Thameslink mellom London King’s Cross og Stevenage / Peterborough
Northern mellom Carlisle og Newcastle
ScotRail mellom Glasgow Central og Edinburgh
TransPennine Express mellom Manchester / Leeds og York / Newcastle

– Ekstremt blodige

Eit vitne fortel til Sky News at han såg personar som forsøkte å komme seg unna gjerningspersonane.

– Dei var ekstremt blodige, seier vitnet Gavin til nyheitskanalen.

Vitnet skildrar scener av menneske som kollapsa på golvet, før dei fekk hjelp av ambulansepersonell.

– Det var fleire personar som hadde blitt stukne, seier han.

Toget stoppa i Huntingdon etter meldingar om knivstikkingar.

Foto: JUSTIN TALLIS / AFP / NTB

– Djupt urovekkande

England sin statsminister Keir Starmer omtalar den «forferdelege» hendinga som «djupt urovekkande»

– Den forferdelege hendinga på eit tog nær Huntingdon er djupt urovekkande. Mine tankar går til dei som er råka, og eg takkar naudetatane for innsatsen, skriv Starmer på X.

Statsministeren ber folk i området om å følgje råd frå politiet.

England sin statsminister Keir Starmer er uroa over hendinga i Huntingdon.

Foto: Leon Neal / Reuters / NTB

Ordførar i Peterborough og Cambridgeshire, Paul Bristow, sine «tankar og bønner går til alle som er råka», skriv han på X.

Bristow reagerer på «fryktelege scener» som har utspelt seg på toget.

Også styreformann i Det konservative partiet, Kevin Hollinrake, skildrar hendinga som «skremmande scener».

– Mine tankar går til offera og naudetatane som handterer denne saka, skriv Hollinrake på X.

Over 30 væpna politibetjentar jobbar på staden.

Foto: JUSTIN TALLIS / AFP / NTB

Interessert i utanriks? Høyr redaksjonen sin nyaste podkast-episode:

Publisert

01.11.2025, kl. 22.39

Oppdatert

01.11.2025, kl. 23.57

Fleire knivstukne på tog i England – NRK Norge – Oversikt over nyheter fra ulike deler av landet

Tags: