{"id":246174,"date":"2025-11-20T10:55:23","date_gmt":"2025-11-20T10:55:23","guid":{"rendered":"https:\/\/www.europesays.com\/es\/246174\/"},"modified":"2025-11-20T10:55:23","modified_gmt":"2025-11-20T10:55:23","slug":"nostalxa-del-clas-posibilidaes-duna-comunida-ciclista-nortes","status":"publish","type":"post","link":"https:\/\/www.europesays.com\/es\/246174\/","title":{"rendered":"Nostalxa del CLAS: posibilidaes d’una comunid\u00e1 ciclista – Nortes"},"content":{"rendered":"

Des\u00e9u de la comunid\u00e1<\/p>\n

Esti d\u00eda, en Twitter filosof\u00eda\u2122 xurd\u00eda una de les discusiones qu\u2019espa\u00f1en recurrentemente nesi espaciu de conversaci\u00f3n p\u00fablica: nesti casu, alredor de la interpretaci\u00f3n de les idees de la fil\u00f3sofa Hannah Arendt sobre\u2019l conceptu de comunid\u00e1. <\/strong><\/p>\n

El discutiniu entam\u00f3 con un tweet de la escritora y periodista Azahara Palomeque,<\/strong> que compart\u00eda una semeya de Ram\u00f3n Aguilar na que pod\u00eda vese a unes se\u00f1ores charrando al frescu. Palomeque reclamaba los \u00abafectos de barriu\u00bb<\/strong> aduciendo que, seg\u00fan Arendt, \u00abla perda de venceyos con amigos y vecinos nos vuelve m\u00e1s proclives al totalitarismu<\/strong>\u00bb al imponese\u2019l \u00abpart\u00edu\u00bb sobre la \u00abcomunid\u00e1\u00bb.<\/p>\n

\n

Dice Hannah Arendt que la p\u00e9rdida de v\u00ednculos con amigos y vecinos nos vuelve m\u00e1s proclives al totalitarismo, porque el sentido de pertenencia lo otorga un partido y sus mentiras, y no la comunidad. Este verano de incertidumbre pol\u00edtica, practiquemos el afecto de barrio. pic.twitter.com\/27MKVWPCQt<\/a><\/p>\n

\u2014 Azahara Palomeque (@Zahr_Bloom) July 16, 2023<\/a><\/p><\/blockquote>\n

Por embargu, dellos fil\u00f3sofos matizaron \u2014creo que con inter\u00e9s\u2014 na mesma rede social esta interpretaci\u00f3n de Hannah Arendt: asina, l\u2019escritor Xandru Fern\u00e1ndez <\/strong>afirm\u00f3 que \u00ables sielles de xuncu pueden ser tan totalitaries o m\u00e1s que los sillones de terciopelu\u00bb, mentes el fil\u00f3sofu pol\u00edticu Edgar Straehle<\/strong> negaba\u2019l calter \u00abcomunitarista\u00bb de la pensadora alemana y l\u2019investigador Ram\u00f3n Mistral<\/strong> afirmaba que lo que ye \u00abtotalitario\u00bb ye\u2019l \u00abdes\u00e9u de la comunid\u00e1\u00bb, al marxe de que se considere una y non otra comunid\u00e1 como \u00abaut\u00e9ntica\u00bb.<\/p>\n

Ello ye que, nestos d\u00edes \u00faltimos del Tour de Francia, si pensamos nuna \u00abcomunid\u00e1\u00bb<\/strong> \u2014con sill\u00edn antipr\u00f3stata\u2014 que resiste n\u2019Asturies, de manera improbable, podemos guapamente parar mientes na nostalxa del CLAS<\/strong> (l\u2019equipu ciclista de la Central Llechera Asturiana): esi equipu que nos a\u00f1os 90 algam\u00f3\u2019l ciclismu profesional con dellos \u00e9xitos notables y que desapaeci\u00f3, pese al fuerte raiga\u00f1u popular, a finales de la d\u00e9cada.<\/p>\n

\"\"Tony Rominger y Fernando Escart\u00edn col maillot del Mapei-CLAS <\/p>\n

A d\u00eda de g\u00fcei, cuentes d\u2019Instagram o Facebook como \u00abXeneraci\u00f3n CLAS\u00bb <\/strong>cuenten con un bon n\u00famberu de siguidores y reflexen, al empar, el potencial identitariu (comunitariu) que tuvo esti equipu ciclista, como se puede ver nos maillots que repliquen angua\u00f1o los que llevaron hai y\u00e1 30 a\u00f1os Tony Rominger, I\u00f1aki Gast\u00f3n o Federico Etxabe. Munchos aficionaos a esti deporte remembren perfectamente etapes como la xuba al Narancu del 14 de mayu de 1993 na que Rominger sentenci\u00f3 la Vuelta a Espa\u00f1a,<\/strong> y que fixo que\u2019l suizu se presentare como una alternativa asturiana a la omnipotencia d\u2019Indur\u00e1in<\/strong> \u2014lo que, por cierto, mos da dalguna pista del peculiar funcionamientu de les comunidaes que xenera\u2019l ciclismu\u2014.<\/p>\n

Pero \u00bfqu\u00e9 foi exactamente\u2019l CLAS?<\/strong> \u00bfC\u00f3mo foi la comunid\u00e1 que form\u00f3? \u00bfY por qu\u00e9 tuvo tantu pesu na identid\u00e1 y alcordanza de los aficionaos asturianos?<\/p>\n

Trabayadores, socios y ciclistes<\/p>\n

Si dalgo destaca de la historia del CLAS ye que xurdi\u00f3 de los propios obreros de la f\u00e1brica <\/strong>de la Central Llechera Asturiana.<\/strong> Arturo Paraj\u00f3n<\/strong>, f\u00edu del fundador del CLAS, Ismael Paraj\u00f3n \u2014trabayador de la Central y vicepresidente del equipu\u2014, foi ciclista amateur y recuerda pa NORTES c\u00f3mo entam\u00f3 la so activid\u00e1<\/strong>: empez\u00f3se nel a\u00f1u 78, anque a lo primero nun se corr\u00eda embaxo\u2019l nome del CLAS, y \u00aba mitad de temporada fue cuando se fund\u00f3 el Club Ciclista CLAS y empezamos unos cuantos: Antonio Sampedro \u201cEl Cabritu\u201d, dos chavales que uno se llamaba Ram\u00f3n y otro Gerardo, hijos de trabajadores\u2026\u00bb. <\/p>\n

Precisamente, l\u2019afici\u00f3n al deporte fixo que se plantegare a los responsables de la empresa qu\u2019apoyaren el proyectu d\u2019un equipu ciclista pa rapacinos,<\/strong> que foi medrando r\u00e1pidamente: pente medies de Ram\u00f3n Pintado \u2014que por ser carpinteru ten\u00eda m\u00e1s mano cola direcci\u00f3n y con Manuel Pedreira, director financieru\u2014 y coles perres del equipu de f\u00fatbol que taba acabante de desapaecer, entam\u00f3 l\u2019activid\u00e1 del CLAS qu\u2019algam\u00f3 bien ceo\u2019l nivel d\u2019aficionaos.<\/p>\n

Ye precisamente esti venceyu colos trabayadores y los socios de la propia Central Llechera \u2014esto ye, los que vienden la lleche a la empresa\u2014 lo que xener\u00f3\u2019l particular sent\u00edu de pertenencia al equipu de los aficionaos. Acordies con Xurde Llano Montes,<\/strong> responsable de la cuenta d\u2019instagram Xeneraci\u00f3n CLAS, muncha xente daquella yeren socios, o fueran, o ten\u00eden un v\u00ednculu cola central m\u00e1s fuerte que\u2019l qu\u2019hai agora\u00bb, y remembra que \u00abmio p\u00e1 foi trabayador de la CLAS y mio t\u00edu tami\u00e9n, y como yo muncha xente<\/strong>\u00bb. <\/p>\n

\"\"Miguel Indur\u00e1in y Tony Rominger nel Tour de Francia de 1993<\/p>\n

El Tarangu<\/p>\n

L\u2019eventu que marca la progresi\u00f3n del club ye la llegada del y\u00e1 ex-ciclista Jos\u00e9 Manuel Fuente<\/strong>, \u00abEl Tarangu\u00bb,<\/strong> como director deportivu, que llevar\u00eda al CLAS de la categor\u00eda d\u2019aficionaos a la de profesionales. El ciclista de Llimanes, qu\u2019acababa de retirase depu\u00e9s d\u2019una carrera exitosa pola nefropat\u00eda cr\u00f3nica qu\u2019acabar\u00eda mat\u00e1ndolu, determin\u00f3\u2019l calter del proyectu<\/strong>: acordies con Silvino D\u00edaz,<\/strong> ex-corredor y auxiliar del CLAS nes sos etapes profesional y amateur, \u00abla mentalidad de El Tarangu era ir poco a poco, sin llegar a mucho gasto, y se basaba en la gente de aqu\u00ed para dar oportunidades a la cantera y fichar alguno con m\u00e1s experiencia\u00bb.<\/p>\n

Del mesmu mou, Paraj\u00f3n se\u00f1ala la importancia de la llegada de Fuente al equipu: \u00abLo busc\u00f3 Luis Paraj\u00f3n, que era muy amigo de \u00e9l. El Tarangu fue la persona, para nosotros, que luchaba por la cantera. <\/strong>Por tener una cantera de Asturias, hacer un nombre con gente asturiana\u2026 Aunque hab\u00eda gente gallega, se sent\u00edan asturianos\u00bb.<\/p>\n

Esta visi\u00f3n d\u2019un equipu construy\u00edu d\u2019a poquitinos y a partir de la cantera ye fundamental pa comprender los primeros a\u00f1os del club<\/strong>: los \u00e9xitos de la etapa amateur, cuando\u2019l CLAS yera \u00fan de los equipos \u00abpunteros\u00bb de Espa\u00f1a y se ganaben munches carreres (Silvino D\u00edaz dixit) ye insepartable del proyectu qu\u2019arm\u00f3 El Tarangu pal equipu. Ye por eso que les xeneraciones m\u00e1s nueves marcaes pola impronta del CLAS reivindiquen la figura del ciclista uvi\u00e9in: como apunta Xurde Llano Montes, \u00abensin la direcci\u00f3n de El Tarangu nel CLAS nos a\u00f1os primeros nun hubiera lo qu\u2019hubo agora.<\/strong> Y ensin los paisanos, trabayadores de la central, que crearon una escuela ciclista pa los sos cr\u00edos\u00bb.<\/p>\n

\"\"Jos\u00e9 Manuel Fuente, el Tarangu, na so etapa como corredor<\/p>\n

Sicas\u00ed, cuando l\u2019equipu pasa a profesionales nel a\u00f1u 1988 y s\u2019empieza a fichar corredores de fuera, la visi\u00f3n de los empresarios choca cola d\u2019El Tarangu, y acaben despidi\u00e9ndolu nel 89, <\/strong>a\u00f1u nel que lleguen les primeres victories embaxo la direcci\u00f3n de Juan Fern\u00e1ndez y entama\u2019l patrociniu de la desaparecida Cajastur. Los ciclistes, acordies con Silvino Garc\u00eda, \u00absufrieron mucho cuando lu quitaron del equipu\u00bb, porque El Tarangu \u00abera un cachu pan pa la gente\u00bb, y la mentalid\u00e1 del equipu cambi\u00f3.<\/p>\n

Ye ende, de toles maneres, que comienza la historia m\u00e1s conocida del CLAS<\/strong>: la del llideralgu de Federico Etxabe, que gan\u00f3 la\u00a0Vuelta a <\/a>Galicia\u00a0en 1990 y una etapa na Vuelta a Espa\u00f1a; y I\u00f1aki Gast\u00f3n, que gan\u00f3 una etapa na Volta a Catalu\u00f1a del mesmu a\u00f1u; la de la llegada de refuerzos como Pello Ruiz Cabestany en 1991 y, sobremanera, la del fichaxe del suizu Tony Rominger en 1992, que permitir\u00eda algamar dos Vueltes a Espa\u00f1a en 1992 y 1993 y un segundu puestu nel Tour nesti \u00faltimu a\u00f1u. <\/p>\n

\"\"Portada del diariu AS, con El Tarangu na so \u00e9poca nel equipu KAS<\/p>\n

Nesi momentu, l\u2019equipu consigue los sos mayores \u00e9xitos deportivos y tresf\u00f3rmase nuna alternativa mui real al dominiu de Miguel Indur\u00e1in nes grandes vueltes,<\/strong> hasta\u2019l puntu de que Rominger ye quien a disputa-y al ciclista navarru\u2019l r\u00e9cord de la hora. La semiente de la decadencia, poro, y\u00e1 taba echada: dende 1991, la xunta directiva de la Central Llechera nun ten\u00eda mui claro que-yos interesare siguir sofitando econ\u00f3micamente al equipu y, cuando nel a\u00f1u 94 entra\u2019l patrociniu de la marca italiana de materiales pa la construcci\u00f3n Mapei, el CLAS pasa a tener llicencia italiana. <\/p>\n

Masque se gana una tercera Vuelta a Espa\u00f1a con Rominger, los ciclistes asturianos ven\u00edos del CLAS pierden pesu definitivamente nel nuevu equipu \u2014qu\u2019acabar\u00eda dirixendo, por cierto, l\u2019\u00ednclitu Patrick Lefebvre, que g\u00fcei gobierna con mano de fierru\u2019l Quickstep d\u2019Julien Alaphilippe<\/strong>\u2014. El patrociniu asturianu acaba dafechu nel a\u00f1u 95, como tantes otres coses: la historia del CLAS mos apriende que, como diz el director de cine Ram\u00f3n Llu\u00eds Bande, nun hai manera de poner la c\u00e1mara n\u2019Asturies y nun grabar la desapaici\u00f3n de dalgo.<\/p>\n

Un CLAS del futuru<\/p>\n

\u00bfQu\u00e9 ye lo que ten\u00eda\u2019l CLAS, que fac\u00eda que funcionare de facto como l\u2019equipu d\u2019Asturies? De mano, Xurde Llano Montes, de Xeneraci\u00f3n CLAS, se\u00f1ala la importancia del calter xeneral del equipu, y\u00e1 qu\u2019\u00abel ciclismu nun ye un deporte tan llocal como\u2019l f\u00fatbol, polo qu\u2019un equipu como\u2019l CLAS podr\u00eda ser asturianu<\/strong>. Al nun tener un campu propiu, pod\u00eda ser de cualquiera\u00bb.<\/p>\n

Nesti aspectu totalizador del CLAS coincide tami\u00e9n Silvino D\u00edaz, que vivi\u00f3 mui de cerca los d\u00edes de les grandes aficiones al equipu asturianu: \u00abye muy apoyao por la gente aqu\u00ed de Asturias, \u00bfentiendes? Era la del demonio de aquella.<\/strong> Eso hasta el final, no solo cuando estaba el Tarango, fue siempre. Era un poco el equipu como si fuere el equipu de Asturias. <\/strong>Era el de profesionales, no hab\u00eda otru. La gente quer\u00eda defender los colores de la tierra, y apoyaban, y para encima como era un equipu punteru\u2026\u00bb.<\/p>\n

El sent\u00edu de pertenencia alredor del CLAS, poro, xurd\u00eda de l\u2019asociaci\u00f3n de la xente cola cooperativa<\/strong> (socied\u00e1 agraria de tresformaci\u00f3n, pa ser exactos) de la que yera socio o trabayador; de los m\u00e9todos, personalid\u00e1 y visiones d\u2019El Tarangu<\/strong>; de los \u00e9xitos de Rominger<\/strong> y de la solombra suiza d\u2019Indur\u00e1in. Pero \u00bfsedr\u00eda interesante recuperar aspectos d\u2019esti mundu ciclista, y\u00e1 desapaec\u00edu, pa los nuesos afectos y comunidaes del futuru?<\/p>\n

\"\"Formaci\u00f3n del equipu CLAS na etapa del patrociniu de Cajastur<\/p>\n

Ello implica, claro, cuestionase\u2019l valor pol\u00edticu de la nostalxa, como bien amos\u00f3 Grafton Tanner<\/strong> en Las horas han perdido su reloj. Las pol\u00edticas de la nostalgia (Alpha Decay). Asina, el mesmu Arturo Paraj\u00f3n afirma que, anque \u00abser\u00eda muy bueno [dalgo como\u2019l CLAS], tanto para el deporte como el ciclismo como para la sociedad\u00bb porque\u2019l deporte ta mui globaliz\u00e1u <\/strong>y y\u00e1 nun somos quien a facer nada \u00abpor gusto, perdiendo dinero del bolsillo, tiempo con la familia, y todo\u00bb, lo cierto ye qu\u2019una estructura como l\u2019equipu de la Central Llechera paez cuasi imposible d\u2019algamar.<\/p>\n

Pel so llau, Xurde Llano Montes ye mui consciente de los problemes que tien l\u2019avezada apellaci\u00f3n a los valores deportivos que munches veces val pa xustificar les pr\u00e1ctiques m\u00e1s ll\u00f3brigues \u2014\u00abyo lo de los valores nel deporte v\u00e9olo complicao. Hai valores de tou tipu: de la trampa, d\u2019arm\u00e1sela al de al llau, y buenos tami\u00e9n. <\/strong>El sacrificiu, el pundonor\u2026 nun s\u00e9 si son buenos o malos\u00bb\u2014, lo que fai que se deba cuestionar la funci\u00f3n del deporte a la hora de formar comunidaes.<\/p>\n

En suma, la existencia del CLAS foi un fitu pal deporte asturianu, que result\u00f3 d\u2019una serie de condiciones hist\u00f3riques<\/strong> (industriales, sociales y econ\u00f3miques) que nun existen angua\u00f1o <\/strong>y, como toles coses, tuvo les sos lluces y les sos solombres. Sicas\u00ed, munchos de los valores que travesaron la so trayectoria son bien reivindicables, ensin falta de cayer na nostalxa. Asina, a la hora de construyir una comunid\u00e1 asturiana (non nam\u00e1s deportiva) que se proyecte hacia\u2019l futuru, munches de les idees d\u2019El Tarangu y d\u2019esos obreros que fundaron l\u2019equipu pueden aprovecenos.<\/strong><\/p>\n