Schlohn mer immer de chopf a be dere abzugshube. Sie müest sicher so 10-20 cm witer obe si demit sie ned an minere vorderstirne isch. De handwerker typ wo alles macht in de sidlig het gseit es isch ned möglich die witer zue z setze. Will sie aber so wie ines grössers element inegschobe usgseht, hinterfrog ich mich.

De glich typ het mer au verzellt dass sie en ganzi huube händ müese wechsle benere andere wohnig, will immer s uhre symbol blinkt het. Ich hanem denn gseit dass das vom filter de wartigsintervall isch und mer eifach nur lang d uhr mues drucke, demits ufhört. Er het denn gmeint das gits ned und isch wegloffe.



—
Actual_Beautiful_420

4 comments

  1. Generell sind sie schon istellbar. Lueg mau im handbuech wie wir me die maximal Cha inestosse.

  2. Definitiv. Mi gsehts obe – schieb mal mit chli Chraft, müesst ga. Mir hend die glich aber nid VZug…

  3. Lut [Iibaualeitig](https://www.vzug.com/medias/sys_master/imported-documents/imported-documents/h0e/h95/11121895866398/1038818-00-AB.pdf) cha me d Höchi durchus verstelle. Site 2, Bildli 4, 5 und 6.

    Zuedem gits dä “Teleskopverschalung Unterteil” (dr unteri Teil vo der “Balke-Verkleidig” vo dr Decki zum eigentlige Abzug) wohl lut Iibaualeitig (Site 2, obe) so wies usseht in 50cm und 70cm.

    In dr [Ersatzteilliste](https://www.vzug.com/medias/sys_master/sparePartViews/sparePartViews/h29/h35/10975727452190/sparepartview-6301400003-de.pdf) sind auf zwei Variante vo dere “Teleskopverschalung Unterteil” (Position 501) ufgfüehrt ud dr letschte Site, aber kei Ahnig, ob das jewills d 50er und 70er Variante sin.

    Dr Abstand Unterkante vom eigentlige Abzug zue dr Decki isch (wenn me alles richtig iistellte) aber jewiils mindestens (Iibaualeitung, Site 2, obe):

    * Abluft, 50er: 64cm
    * Abluft, 70er: 77cm
    * Umluft, 50er: 69cm
    * Umluft, 70er: 87cm

    Edit: Ahjo, wenn dr Abstand Unterkante Abzug zur Herdoberflächi nid mindestens 65cm (Elektro) bzw. 75cm (Gas) isch, muess de Monteur-Globi ehh nomol ahsuuge und s richtig iistelle, siehe Iibaualeitig Site 2, Bildi 4. Will sunst wär das jo brand-gföhrlich weg dr Hitz. Öbbis wo me in dr Schwiz jetzt sitme Monet sehr, sehr gnau druff muess luege – au usserhalb vom Wallis – was sicher au im Intresse vo dim Vermieter isch dass er nid haftbar isch, wenn öbis wurd passiere 😉

  4. Also Dini Ankedote laht en recht klare Idruck überd Kompetenz vo dem Kerl. Isch aber leider oft no so, Husabwart sind halt us minere Erfahrig ehner leidlich talentiert und i allere Regel null motiviert, öppis zmache, wa sie nöd scho hundert mal gmacht hend oder wo mer sis Hirni müesst ischalte defür. Isch denn ifacher, z säge, gaht nöd.

Leave a Reply