Lunde stod som ein vegg mot brasilianarane i 33-14-sigeren søndag og gjekk av banen med 14 redningar og ein redningsprosent på 67.
Like før meisterskapen kunngjorde ho at VM blir hennar siste for landslaget. Ho har ikkje komme på andre tankar, lovar ho.
– Nei, men eg veit ikkje om eg gir meg heilt, seier Lunde til NTB.
Kontrakten hennar med Raude Stjerne i Serbia går ut ved årsskiftet.
– Eg har sagt at vi snakkar om det etter meisterskapen. Alt er aktuelt.
– Også spel i Noreg?
– Ja.
45-åringen har saman med eit grunnsolid forsvar gjort at Noreg er det laget alle fryktar å møte i VM. Først ut er Montenegro i kvartfinalen tysdag.
Interesse
Landslagssjef Ole Gustav Gjekstad lèt seg begeistre av målvaktveteranen.
– Det er heilt vanvitig. Redningsprosentar har stort sett gått nedover på målvaktene dei siste åra på dame- og herresida. Eg trur ikkje Katrine heller har hatt eit VM med ein så høg redningsprosent etter seks kampar, seier Gjekstad til NTB.
Gjekstad er klar på at 45-åringen har gode kort på handa om ho vel å halde fram med klubbkarrieren.
– Det er ikkje nokon dårlege søknader ho leverer her for å få nokon gode tilbod.
– Korleis er interessa?
– Eg veit at det er interesse, men eg har ikkje konkret kunnskap om kven, seier Gjekstad.
Betre enn nokon gong?
Lagvenninne Stine Skogrand bruker uttrykket «GOAT» (Greatest of all time) for å beskrive Lunde.
– Eg skjønner ikkje at det er mogleg. Det er ekstremt sterkt av henne. Vi nyt kvar kamp vi har igjen med Katrine på landslaget, og eg trur ho også nyt det. Ho stråler, seier Skogrand.
Veronica Kristiansen hyllar også Lunde:
– Det er trist for oss og norsk og internasjonal handball at det er hennar siste meisterskapar. Ho er ein einar og eit fantastisk menneske. Ho krev av deg, men samstundes er ho medmenneskeleg, seier Kristiansen.
Lunde og co. skal i aksjon igjen tysdag mot Montenegro.
Ungarn og Frankrike/Nederland skal gjere opp i den andre kvartfinalen på Noregs side i sluttspelet.
Publisert
08.12.2025, kl. 08.03
Oppdatert
08.12.2025, kl. 08.14