Kort oppsummert

  • HelsaMi bryt likestillingslova ved manglande universell utforming, ifølgje tilsynet.

  • Helseplattformen risikerer dagbøter på 50.000 kroner. Frist for å rette resterande feil er 19. desember.

  • Standarden blei innført ved lov i USA i 2017, etter at EU innførte det året før.

Oppsummeringen er laget av KI-verktøyet ChatGPT og kvalitetssikret av våre journalister.
Les mer om hvordan vi forholder oss til kunstig intelligens.

Tilsyn med HelsaMi har avdekka mange feil på universell utforming. No har Helseplattformen fått vedtak om dagbøter.

Fristen for å rette avvika er 19. desember. Etter dette må Helseplattformen betale bøter på 50.000 kroner per dag. Tre av feila er alvorlege, mens 17 er moderate.

– Vi skal rette det som står i vår makt til å rette innan 19. desember. Vi blir ganske sikkert ikkje ferdig til den datoen, seier administrerande direktør Siri Berg i Helseplattformen til Sunnmørsposten.

Standard i EU og USA

Feila gjer at webversjonen av HelsaMi ikkje er like tilgjengeleg for alle, og bryt med likestillings- og diskrimineringslova. Det går særleg utover personar som har nedsett syn eller er blinde, har nedsett motorikk eller nedsett kognisjon.

– I 2016 blei denne standarden innført i EU. I 2017 blei standarden del av lova i USA. Dette skulle dermed ikkje vere noko nytt for leverandøren Epic heller, seier tilsynsdirektør Malin Rygg til Sunnmørsposten.

Blant dei som har kontakt med helsevesenet, er det fleire i sårbare livssituasjonar og kanskje med nedsett funksjonsevne, legg ho til.

– Manglande vilje og evne

Helseplattformen AS har vist manglande evne og vilje til å rette feila som er avdekka. Det gjeld både feil dei sjølv kan rette og som leverandøren må rette, skriv Tilsynet for universell utforming av IKT i ei pressemelding.

I juni blei Helseplattformen informert om at det var funne 119 enkeltfeil innan 12 av 14 lovkrav. I august fekk dei full rapport.

– Dei aller fleste kjem i mål innan fristen på åtte veker. Her utvida vi til 16 veker, seier Rygg.

Den utvida fristen var 1. desember.

– Framleis står 64 feil uløyste. Mange er relativt enkle å rette på kort tid, seier tilsynsdirektøren.


Siri Berg i Helseplattformen AS.
Foto: Staale Wattø / ArkivHelseplattformen svarer

– Vi har retta mykje av det vi sjølv rår over, men det er tydeleg at tilsynet ikkje synest det er bra nok. Vi kjem derfor til å be om eit møte om korleis vi skal løyse dette vidare, seier Berg.

– Og så har vi ein dialog med Epic om dei kan framskunde sin plan, seier Helseplattform-sjefen.

Rekke med tilsyn

Rekka av tilsyn med Helseplattformen byrjar å bli lang. I februar ba Stortinget om opne og uavhengige analysar av Helseplattformen. Rapporten blei kjend 8. desember. Den legg vekt på lav brukarvenlegheit, høge kostnader og utfordringar med legemiddelmodulen.

2. desember opplyste Datatilsynet at dei har funne «vesentlege manglar» og brot på personvernreglane.

Hausten 2024 kom Riksrevisjonen sin rapport om Helseplattformen. Samla vurdering var at planlegginga, organiseringa og innføringa av Helseplattformen var «sterkt kritikkverdig».

Rapport: Helseplattformen har gjort helsepersonell mindre effektive Datatilsynet kritiserer Helseplattformen etter tilsyn – varsler pålegg om retting Statsråden kritiserte Helse Midt-Norge