Sist veke møttest partane for å signere ei avtale som skal sikre at idrettslaget har gode forhold til aktivitetar som alpint, freeski og snowboard.
I ei pressemelding skriv dei at avtala er av dei meir omfattande i regionen. Dei reknar med at SkiGeilo bidreg med tenester og ressursar tilsvarande to millionar kroner.
– Det omfattande samarbeidet med Geilo IL viser kor viktig det er å ha lokalt eigde bedrifter som ser behovet for å ta ansvar og bidra til utvikling av lokalsamfunnet, seier Jarle Opsahl Gjertsen, dagleg leiar i Geilo IL.
Viktig avtale
Dei er fornøgde med å ha landa avtala før ein vintersesong med fleire store arrangement, mellom anna NM Masters i alpint og NM i freeski. I avtala forpliktar SkiGeilo seg til å stille med treningsarena, heisar, folk og snøproduksjon gjennom vinteren.
Dei har også lova tekniske ressursar i samband med arrangement. I tillegg ligg det inne heiskort, rennkort og parkering for frivillige.
– For Geilo IL er dette samarbeidet avgjerande for å kunne tilby gode treningsforhold og utviklingsmoglegheiter for barn, ungdom og topputøvarar, seier styreleiar i idrettslaget, Jarl Rune Kjæmperud.
Vil bidra
I løpet av sommaren har SkiGeilo gjort ein solid gravejobb i den delen av anlegget som har hopp og park, for å sikre tidlegare opning for brett- og. Dei reknar med at oppgraderinga har kosta kring ein million kroner.
– Me ynskjer å vere ein aktiv medspelar for idretten og lokalsamfunnet. Eit sterkt idrettslag og gode treningsarenaer er heilt sentralt for å skape vekst, aktivitet og stoltheit på Geilo, seier Robert Brunvoll, adm.dir. i SkiGeilo/Geilo Holding i pressemeldinga.