Familien sand, med blant anna kunstnarane Aune og Vebjørn Sand, får kjøpe Todalen skule av Surnadal kommune for 1 krone.
Formannskapet vedtok salet einstemmig onsdag kveld.
Salet gjeld for sjølve skulebygget og tilhøyrande tomt. Barnehagedelen av eigedommen vil framleis vere kommunal.
Samtidig får familien Sand forkjøpsrett til å kjøpe barnehagebygget til takst dersom kommunen ikkje har funne alternativ bruk innan utgangen av 2027, melder Driva.
Skulen vart lagt ut for sal i 2023.
Kunstnar Aune Sand bekreftar overfor NRK at dei skal kjøpe bygget.
– Det er ei stor ære for familien Aulie-Sand, og vi gler oss til å komme til det vakraste i Noreg, seier han.
Han seier bygget skal bli brukt til mange ting, mellom anna galleri.
– Når vi kunstnarar får æra og tilliten frå kommunen, vil vi gjere alt i vår makt for at bygget skal vere til glede for regionen.
Kunstnaren har allereie planar om å melde flytting til Nordmøre i løpet av dei neste dagane.