Saka samanfatta:
- Ein 90 år gammal mann vart funnen hardt skadd utandørs i Elverum torsdag kveld.
- Samstundes oppstod det brann i mannens bustad, som vart totalskadd innvendig.
- Ei kvinne i 40-åra er sikta for grov vald mot mannen og varetektsfengsla i fire veker.
- Politiet undersøker om det er ein samanheng mellom brannen og valden.
- Den sikta kvinna erkjenner ikkje straffskuld.
- Det er ikkje kjent nokon relasjon mellom den fornærma mannen og den sikta kvinna.
Oppsummeringa er laga av ei KI-teneste frå OpenAI. Innhaldet er kvalitetssikra av NRK sine journalistar før publisering.
Laurdag vart ei kvinne i 40-åra varetektsfengsla i fire veker for grov vald mot 90-åring i Elverum. Ho vart også ilagt brev- og besøksforbod.
Det er det same som påtalemakta la ned påstand om. Fengslinga blir mellom anna grunngitt med fare for bevisøydelegging.
Den sikta kvinna motsette seg fengslinga, seier hennar forsvarar, Frode Aabak.
– Ho erkjenner ikkje straffskuld, seier han til NRK.
Han vil ikkje gå inn på kva kvinna forklarte i fengslingsmøtet.
Vart funnen av forbipasserande
Det var seint torsdag kveld at ein forbipasserande fann ein eldre mann utandørs ved Midtskogen i Elverum.
Samstundes oppstod det brann i eit hus, som ifølgje politiet tilhøyrde mannen. Det vart totalskadd innvendig, trass tidleg sløkking.
90-åringen vart frakta til Hamar sjukehus med omfattande skader som ifølgje politiet var påført med eit reiskap.
Laurdag klokka 13.00 var det fengslingsmøte i Hamar tinghus. Kvinna vart varetektsfengsla i fire veker med brev- og besøksforbod.
Foto: Frode Meskau / NRK
Kvinna i 40-åra vart pågripen og sikta for grov kroppsskade kort tid etter hendinga. Ho er også sikta for brudd på straffelova 355, som omhandlar brannstifting. Den sikta kvinna ville ifølgje politifullmektig Sofie Lilleøren Veum ikkje forklare seg til politiet fredag.
– Så langt eg kjenner til, har ho vore i ei primærpsykiatrisk undersøking, utan at eg vil gå nærmare inn på resultatet av den. Det er alt eg kan seie, sa forsvarar Frode Aabak til NRK fredag.
Fornærma avhøyrt
Det skal ikkje vere ein relasjon mellom den sikta kvinna og den fornærma mannen.
Den fornærma mannen har blitt avhøyrt av politiet.
– Han forklarer at han er utsett for vald, og utover dette så er det for tidleg å seie noko meir, sa Veum fredag.
Ifølgje politiet er mannen påført skader i form av at det vart brukt eit reiskap. Veum vil ikkje seia noko om kva reiskap det er snakk om, eller kva slags beslag som er gjort.
NRK var fredag i kontakt med bistandsadvokat Øyvind Borg. Han har ikkje ønskja å gje nokon kommentarar på dåverande tidspunkt.
Brann i same nabolag
Kvinna er ikkje sikta for brannstifting, men politiet ser på om brannen i mannens bustad torsdag og valden kan ha samanheng.
Det var òg brann i ein fritidsbustad i same område onsdag. Politiet ser på om det er nokon samanheng mellom dei to hendingane.
Publisert
20.12.2025, kl. 15.25
Oppdatert
20.12.2025, kl. 16.35