Det var klokka 01.18 natt til søndag at det kom melding om brann i ein tomannsbustad på Kaupanger.
Det vart då opplyst om røykutvikling i eit sikringsskap i kjellaren i ein tomannsbustad. Ifølgje politiet skal det ha vore flammar, men då naudetatane kom til staden, var det berre røyk.
Mange som var på veg heim frå romjulsfest i Skogly natt til søndag fekk med seg det som skjedde.
Foto: Ida Ur Haugen
Brannen skal så ha blussa opp att, men like etter klokka 02.00 hadde brannmannskapa kontroll over flammane.
To personar oppheldt seg i bustaden då det byrja å brenne, desse vart evakuert og kunne ikkje opphalda seg i bustaden resten av natta på grunn av mykje røyk.
– Naboane som bur i den andre delen av bustaden kunne overnatta i bustaden, medan dei to som vart evakuerte vart køyrde til legevakt etter å ha pusta inn røyk og overlatne til helsepersonell, opplyser operasjonsleiar i Vest politidistrikt, Tatjana Knappen.
Politiet legg til at dei to i bustaden var ei kvinne i 50-åra og ei kvinne i 20-åra og at desse to etter kvart overnatta hjå familie.