Det vart ei svært sterk NM-helg for korpsmiljøet i Florø og Bremanger. Både Flora-Bremanger Brassband og Florø Hornmusikk sikra seg pallplass i sine divisjonar – og tok i tillegg med seg eigne prisar heim.
Pallen og opprykk
Flora-Bremanger Brassband konkurrerte i 4. divisjon og leverte ein svært solid prestasjon. Med 93 poeng enda dei på 2.-plass, berre eitt poeng bak vinnarane Skeie Brass (94 poeng). 2.-plassen betyr at dei rykkjer opp til 3. divisjon neste gong NM blir arrangert.
I tillegg vart det ekstra heider då gruppeprisen for beste tuba-rekke i divisjonen gjekk til Flora-Bremanger Brassband.
Dermed kunne brassbandet reise heim både med pallplass, opprykk og eigen spesialpris.
Solistpris til Florø Hornmusikk
I 5. divisjon leverte Florø Hornmusikk også ein sterk konkurranse. Korpset enda på 3. -plass med 92 poeng. Langhus Brass vann divisjonen med 95 poeng.
Solistprisen i divisjonen gjekk til principalkornetten i Florø Hornmusikk, Eva Cecilie Rognsøy – noko som løfta helga endå eit hakk for Florø-korpset.
I elitedivisjonen var det Eikanger-Bjørsvik Musikklag som gjekk heilt til topps og vart norgesmeister med 96 poeng. Manger Musikklag tok sølv, medan Stavanger Brass Band sikra seg bronse.
Totalt vart det delt ut pallplassar i fem divisjonar, med vinnarar frå heile landet. I 1. divisjon vann Rong Brass, i 2. divisjon Agder Brass og i 3. divisjon Evanger Musikklag.