Peru álgoálbmotneavttár Qʻorianka Kilcher váiddii maŋŋebárgga James Camerona ja Disney.
Son čuoččuha ahte leat geavahan su ámadaju lobi haga vuođđun hábmet «Avatar»-rollafiguvrra Neytiri.
– Lea hui unohas diehtit ahte mu ámadadju, go ledjen 14 jagi, lea geavahuvvon dinet ruđaid Disney ja Cameronii muitalkeahttá munnje, dadjá Qʻorianka Kilcher Variety-dieđuid mielde.
Kilcher gáibida earret eará buhtadusa «Avatar»-dietnasiin, ja ahte Disney dovddasta almmolaččat ahte sii leat geavahan su hámi lobi haga.
Qʻorianka Kilcher šattai dovddusin «The New World» filmma bokte. Son neavttašii maid «Yellowstone»-ráiddus.
Foto: Chris Pizzello / Invision,NTB
– Sus lei erenomáš hápmi
Jearahallamis 2024:s, goalmmát filmma oktavuođas «Avatar: Fire and Ash», dadjá Cameron ahte inspirašuvdnan su rollafiguvrii lei Los Angeles Times-aviissa govva. Govva lea váldon «The New World» nammasaš filmmas 2005:s, mas dalá 14-jahkásaš Kilcher neavttašii.
Son galgá leat bivdán hábmejeddjiid geavahit iežas ámadaju vuođđun Neytiri-rollafiguvrra hábmemii.
Kilcher promoteremin «The New World» ja rollafiguvra «Neytiri». Dát eai leat dat govat maidda Cameron čujuha.
Foto: NTB, AP
– Dát lea vuolit oassi su ámadajus. Sus lei hui erenoamáš ámadadju. Deiven su moadde jagi maŋŋá, ja adden sutnje gova tevnnegis, dadjá son jearahallamis.
Maŋŋil go lei oaidnán dán jearahallama 2025:s, de fuomášii neavttár man dárkilit Cameron lei čuvvon su hámi ráhkadit «Neytiri».
Tevnnet mii geavahuvvo duođaštussan váidagii.
Foto: United States District Court
Kilchera advokáhtta, Arnold Peter Peter Law -joavkkus, dadjá ahte dan maid Cameron dagai, ii lean inspirašuvdna, muhto ávkkástallan.
– Son válddii 14-jahkasaš álgoálbmoga áidnalunddot iešvuođaid, loktii daid industriijalaš buvttadanprosessii ja dat genererii miljárdda dollara dietnasa, muhto sus ii jerron ii oktiige lohpi dan dahkat, muitala New York Post dieđuid mielde.
– Boaresáigásaš bargovuohki
2005:s ii lean nu ollu sáhka biometriijas ja dahkujierpmis.
Dan rájes lea Disney rievdadan bargovuogi go deaivvadit eará álgoálbmotjoavkkuiguin.
James Cameron lea ráhkadan earret eará «Titanic» ja «Avatar».
Foto: AFP
Sámeráđi kulturossodaga jođiheaddji Christina Hætta čujuha «Jikŋon 2» (2019) -ovttasbargui.
– Mii oaivvildit ahte ovttasbargu Jikŋon 2:in Walt Disney Animation Studios (WDAS) lea buorre málle dasa mo stuorra fitnodagat sáhttet ovttasbargat eamiálbmogiiguin, ja čájeha ahte lea áibbas vejolaš fitnodagaide nugo WDAS:ige sáhttit doaibmat etihkalaččat, dadjá Hætta.
Ášši lea maid boktán beroštumi Sámis.
Foto: Sámiráđđi
Su mielas Kilcher-ášši ovddasta boaresáigásaš ja dohkkemeahttun bargovuogi.
– Áigodat, goas máilmmiviidosaš fitnodagat sáhtte viežžat inspirašuvnna, sárgosiid ja historjjáid eamiálbmogiin lobi haga, ferte nohkat.
Sihke NRK ja eará mediat leat geahččalan váldit oktavuođa Camerona ja Disney ovddasteddjiiguin, muhto eai leat lihkostuvvan.
Ášši meannuduvvo Californias.
Publisert
08.05.2026, kl. 13.04
Oppdatert
08.05.2026, kl. 14.00