Næringsliv, Elkem Bremanger | Elkem med svakare resultat – aukar kostnadskutta til nær 400 årsverk

Hovudforklaringa på resultatnedgangen er låge prisar på silisium og ferrosilisium.

Dei viktigaste tala frå kvartalsrapporten er:

• Brutto driftsresultat (EBITDA): 523 millionar kroner, ned 19 prosent frå same periode i fjor.
• Driftsinntekter: 3,7 milliardar kroner, ein nedgang på fire prosent.
• Resultat før skatt: Minus 45 millionar kroner, mot minus fem millionar kroner i same periode i fjor.

Saka vart først omtalt i E24.

For å styrkje lønsemda sette Elkem i mars i gang eit omfattande kostnadskuttprogram. Opphavleg var målet å redusere bemanninga globalt med om lag 300 årsverk, men selskapet ventar no å kutte nærare 400.

Tiltaka er venta å gi årlege innsparingar på over 600 millionar kroner.

Elkem har fabrikk i Svelgen, Bremanger. Der jobbar det i dag 230 tilsette.

Nasjonalt har selskapet kring 1500 tilsette, fordelt på fleire fabrikkar og hovudkontoret i Oslo.

Selskapet har òg henta inn 1,8 milliardar kroner i ny eigenkapital og refinansiert bankfasilitetane sine. Den islandske verksemda, Elkem Iceland, er no klassifisert som «avvikla verksemd» etter svake resultat.

Det skjer òg endringar i konsernleiinga. Frå 3. august tek Dag Teigland over som konsernsjef etter Helge Aasen, som har leia Elkem sidan 2009. Samstundes tek Aasen over som styreleiar.