– Dei er komne i ein alder der det er litt spennande med gutar.
Trenar Stig Roar Hovland kan avsløra at det ikkje berre er leiken med kula som står i fokus når Vik sitt J13/14-lag først har teke turen til Ekebergsletta og Norway Cup.
– Det har vore veldig populært å reisa ned at på skulen og treffa dei mellom kampane.
Jentene har storkosa seg i det strålande vêret i hovudstaden, kan Hovland fortelja.
– Det er sydentemperatur her. Heilt magisk.
Tøff motstand
Sportsleg har det òg vore medgang.
– Eg tykkjer det er ein kjempeprestasjon å kvalifisera seg for A-sluttspelet når halve laget består av 13-åringar, seier ein stolt trenar.
I gruppespelet vart det to sigrar og eitt tap. Seinare i dag ventar Bryne på motsett banehalvdel i første utslagskamp.
– Etter det eg har høyrt er det eit veldig godt lag. Dei kom mellom anna langt i Adidas Cup i fjor.
– Systera til Haaland spelar på laget, legg han til.
Dermed er det ikkje anna å gjera enn å bretta opp ermene.
– Me likar å møta gode lag, slå litt nedanfrå. Me får gje alt, så blir resultatet som det blir. Siger eller tap, me tek det som kjem.
I verste fall blir det tur til Tusenfryd i morgon. I beste fall får dei i alle fall ein kamp til.
Desse laga har teke seg vidare i A-sluttspelet førebels:
G13 9-ar Jotun/Lærdal (møter Tertnes torsdag 10:30)
J14 Jotun (møter KFUM-Kam torsdag 10:30)
J14 Sogndal (møter Byåsen torsdag 11:20)
G14 Sogndal (møter Karanba onsdag 18:10
J15 Sogndal (møter Asker/GUI/DIF torsdag 11:30)
J17 Sogndal (møter FC Rosengarten torsdag 12:45)
G19 Vik (møter Stjørdals/Blink torsdag 10:15)