Trafikk, Ulukker | – Tok med seg rundt 30-50 meter med autovern

Tysdag klokka 17:48 vart Hordaland tipsa om eit trafikkuhell i Granvin sentrum.

– Det ser ut som ein bil har køyrt i autovernet, sa tipsaren, som ynskte å vera anonym.

Store materielle skadar

Brannsjef David Skjerven hjå Voss brannvern stadfesta at dei rykte ut på hendinga.

– Det er ein utanlandsk bil som har køyrt utfor vegen og tatt med seg fleire meter av autovernet. I tillegg er det knekt fire stolpar, sa han. 

Varabrannsjef Geir Ove Pedersen sa frå staden at det var to personar i bilen, og at dei verka oppegåande og uskadde.

Ifylgje bilete frå staden såg det ut som store materielle skadar.

Inndrege førarkortet

Operasjonsleiar Tore-Andre Brakstad hjå Vest politidistrikt opplyste at føraren har køyrt ned rundt 30-50 meter med autovern.

– Føraren av bilen, ein mann i 20-åra, får førarkortet sitt inndrege. Me mistenkjer aktlaus køyring.

Ifylgje politiet var det to bilar i eit fylgje. 

– Den andre bilen har også køyrt aktlaus, og føraren av denne har også fått inndrege førarkortet sitt, opplyste Brakstad.