Krim og rettsvesen, Dødsfall | Politiet ynskjer tips frå publikum

Sundag ettermiddag fann ein turgåar ein død person i Vangsvatnet. 

Politiet har sidan jobba med å finna ut av kva som har skjedd.

Framleis har politiet uavklarte spørsmål.

– No har me snakka med dei me trur kan ha vore i kontakt med kvinna, seier politiadvokat Inger-Lise Høyland til Hordaland.

Onsdag ettermiddag går politiet ut og ynskjer tips frå publikum.

Har snevra inn tidsrommet

– Me har ein observasjon av avdøde sundag morgon, fortel politiadvokat Inger-Lise Høyland.

Utifrå observasjonar og vitneavhøyr har politiet danna seg eit bilete av kva område kvinna har oppheldt seg i.

– Me veit ikkje kva som kan ha skjedd, og me gjer undersøkingar for å avklara det me ikkje veit, seier ho og held fram: 

– For å kunna avklara kva som har skjedd må me vita litt om bevegelsane hennar.

Naudetatane rykte ut sundag etter melding om at forbipasserande hadde observert ei død kvinne i Vangsvatnet.
Foto: Marit Folkedal Lussand

Ynskjer tips

– Politiet er interessert i observasjonar av ei kvinne i 40-åra med kort hår, iført mørk tights med kvitt blomstrete motiv, grå joggesko, svart vest med ei tynn, lysegrå jakke over, opplyser Arne Lutro, kommunikasjonsdirektør i Vest politidistrikt, i ei pressemelding.

Kvinna kan ha bore på ein middels stor gråfarga bag.

Kvinna vart funnen ved elvemunninga der Vosso renn inn i Vangsvatnet. 

Politiet er interessert i observasjonar gjort i Strandavegen ved TESS og i retning Voss sentrum, området Langebrua og vidare i retning mot Brynagjelet, i tillegg til heile Tvildemoen.

Det aktuelle tidsrommet er sundag 26. juli mellom klokka 09:00 og 13:00.

– Om nokon har sett kvinna i dette tidsrommet er me interesserte i å få vita om det, seier Høyland. 

Har du tips? Kontakt politiet på telefon 56 52 87 15 eller via https://www.politiet.no/tjenester/tips-politiet/