Krim, Kalvåg | Sikta etter Kalvåg-dødsfall er lauslaten

Mannen i 50-åra har vore varetektsfengsla i samband med saka der ein mann i 30-åra vart funnen livlaus og erklært død i Kalvåg natt til 2. august. Han er sikta for å ha sett den avlidne i ein hjelpelaus tilstand.

Lauslatinga kjem etter at påtalemakta har gjennomført fleire etterforskingsskritt dei siste vekene.

– Påtalemakta vurderer at faren for bevisforspilling ikkje lenger er til stades, opplyser politiet i ei pressemelding.

I tillegg til etterforskingsskritta er det òg gjennomført ei førebels rettspsykiatrisk vurdering av den sikta.

Sjølv om den sikta no er lauslaten, held etterforskinga av dødsfallet fram.

Politiet ventar framleis på viktige svar, inkludert den endelege obduksjonsrapporten, i tillegg til ytterlegare avhøyr av den sikta og resultat frå tekniske undersøkingar.