– Me avlyste paraden etter å ha snakka med ordføraren, kommunedirektøren og andre som òg skulle arrangera parade i helga seier Leiar i Sognapride Elise Hjelleflat Barsnes.
Ho meiner det var ei vanskeleg, men rett avgjerd.
– Sjølv om det kunne vore ei fin markering i kongens ånd, kjendest det litt feil å ha ei så stor feiring medan han låg for døden. Etter den siste oppdateringa i dag tidleg står eg heilt inne for den avgjerda.
Kan koma fleire endringar
Det blir likevel fleire pride-markeringar i Sogndal i helga. Barsnes understrekar at det framleis kan koma endringar, men slik ser programmet ut no:
– Frukosten med Human-Etisk Forbund klokka 10 blir halden som planlagt, og me har flytta heile kulturarrangementet vårt innandørs i Blaoboxen klokka 13.
Oppdateringar om resten av programmet blir publiserte på Sognapride sine nettsider og i sosiale medium.
På Fjøra Pub var planen opphavleg å halda ope som normalt, men fredag ettermiddag får Sogn Avis opplyst at dei held stengt fredag kveld. Laurdagen vil gå som normalt.
Meieriet venta avklaring
Leiar for Studentsamfunnhuset, Jens Petter Sløveren, håpte at Meieriet kunne halda ope etter planen i helga.
Saman Bergen har meldt at arrangement i deira bygg skal tonast ned, men Sløveren venta fredag føremiddag på ei endeleg avklaring.
Sløveren ville gjera sitt for å halda ope og tykkjer pride-markering òg kunne vore ein fin måte å minnast Kongen på.
– Det var Kongen sjølv som sa at nordmenn er jenter som er glade i jenter, gutar som er glade i gutar, og jenter og gutar som er glade i kvarandre. Difor synest eg det kunne passa fint med ei slik markering i kongens ånd.
SISTE: Litt over klokka 11 fredag kjem Sløveren med ei oppdatering:
– Dragshow og kveldsarrangement blir avlyst, men me får framleis halda pride-kafé på Lab-en, seier Sløveren.