Selskapet skriv i ei pressemelding onsdag at Vik Ørsta har vore ein del av Saferoad Group sidan oppstarten, men tek no steget og samlar seg under eit felles merkenamn.
– Dette er ei naturleg utvikling for oss. Me har vore ein del av Saferoad-familien lenge og ønskjer no å synleggjera det tydelegare både internt og ut mot kundane, seier administrerande direktør Kjetil Nesset.
Namneendringa inneber ingen endringar i organisasjonsnummer, eigarskap eller drift. For kundar og samarbeidspartnarar vil kvardagen halda fram som før, med same kontaktpersonar, telefonnummer og produkt. E-post sendt til tidlegare adresser vil automatisk bli vidaresendt.
Saferoad har 3000 tilsette og er ein stor aktør på trafikktryggleik i Europa. Konsernet har hatt stor vekst etter fusjonen mellom Euroskilt og Ørsta-gruppen i 2007 og fleire selskap i gruppa samlast no under Saferoad-namnet.
Nesset meiner bedrifta blir del av eit endå større fagmiljø med brei kompetanse og ressursar.
Vik Ørsta byter gradvis over til ei ny nettside til saferoad.com og skal også få utarbeidd ein ny logo.