Det har gått tre veker sidan Norled, som del av ei reklamasjonssak, fekk tilsendt og montert nye batteri i fartøya «Trym» og «Frey» som går ruter i Florøbassenget.
Prosjektansvarleg Roger Rivedal hos Norled rosar dei involverte.
– Heile prosessen med utskifting gjekk på skinner, og alle involverte har fått mykje skryt for innsatsen. Og ja – vi merkar stor forskjell med positivt forteikn, seier Rivedal til Firdaposten.
No er defekte batteripakker bytta ut og alt fungerer optimalt. Det har påverka rekkevidda frå dag ein etter utskiftinga.
Måtte gå redusert
– Med fire-fem defekte batteri i kvar batteripakke, så hadde vi eit problem. Du kom inn til lading, men hadde ikkje full kapasitet når du gjekk ut igjen. Problema forskauv seg, og neste tur måtte gjerne gå med redusert fart. No er vi kvitt dette problemet, og dermed blir vi også langt sjeldnare forsinka som følgje av at vi ikkje kan gå på planlagt marsjfart, seier Rivedal.
I tillegg til å byte ut batteri i batteripakkane, har Norled også gjort nokre tilpassingar med korleis batteri blir stabla og montert. Det vil gjere liknande operasjonar mykje enklare i framtida.
Produksjonsfeil
Bakgrunnen for utskiftinga var ein reklamasjon mot leverandøren, då det blei oppdaga ein produksjonsfeil på ein serie med batteri som var produsert i 2023.
– No har vi fått på plass batteri med den kapasiteten vi vart førespegla i 2024. Det merkar vi allereie på stabilitet og auka rekkevidd, seier Rivedal.