Airbus krev omgåande oppdatering av mange fly i A320-serien.
Kjelder opplyser til nyheitsbyrået Reuters at rundt 6000 fly skal vera påverka av feilen, eller halvparten av flåten på verdsbasis.
Talet er ikkje stadfesta frå selskapet sjølv, som berre skriv at det er snakk om «eit stort tal» fly.
Problemet vert forklart med at kraftig elektromagnetisk stråling frå sola kan øydelegga data som er kritisk for kontrollsystemet til flya.
– Airbus anerkjenner at desse oppfordringane vil skapa operasjonelle forstyrringar for passasjerar og kundar, skriv selskapet.
Fleire kanselleringar
Oppdateringane må gjennomførast før neste rutineflyging, skriv Reuters. Dei viser til informasjon sendt direkte ut til flyselskapa.
– Desse tiltaka kan skapa kortsiktige forstyrringar for flytider og derfor ulemper for passasjerar. Men som alltid i luftfarten, er sikkerheita det viktigaste, skriv europeiske luftfartsmyndigheiter (EASA).
Den britiske transportministeren seier at følgjene for britiske selskap er avgrensa. Berre eit lite antal fly treng oppdatert programvare, skriv Reuters.
Også London Gatwick flyplass seier dette i liten grad vil påverke flygingar derfrå. Flyselskapet British Airways seier at dei ikkje trur dette kjem til å påverke drifta hos dei, då dette berre gjeld for tre av flya deira.
Måtte nødlanda
Feilen vart oppdaga i samband med ei flyging mellom Cancún i Mexico og Newark i USA 30. oktober.
Da måtte eit Jetblue-fly nødlanda i Florida. Fleire personar vart skadde i samband med at flyet brått mista høgde, skriv Reuters.
Hendinga førte til ei etterforsking av amerikanske luftfartsstyresmakter (FAA).
Verken JetBlue eller FAA har kommentert saka, ifølge nyheitsbyrået.
Ifølge selskapet er det rundt 11.300 Airbus 320-fly i drift på verdsbasis.
Kjelder i bransjen opplyser til Reuters at oppdateringa vil gå ganske fort for rundt to tredelar av dei råka flya. Fleire fly vil likevel truleg måtte byta maskinvare, noko som kan ta mykje lengre tid.
Flyselskap råka
Norwegian har ingen fly av denne typen, og er derfor ikkje påverka.
Air France, American Airlines og Wizz Air er blant dei påverka selskapa.
Easyjet seier like før midnatt at dei er ferdige med dei nødvendige oppdateringane.
Air India seier laurdag morgon norsk tid at dei er ferdig med oppdateringar på om lag 40 prosent av flya deira. Og at dette berre gir nokre forseinkingar.
Japanske ANA har kansellert 65 flygingar. Air New Zealand seier dette påverkar dei, men har ikkje kome med detaljar om kor mykje.
NTB skriv at omfanget av tilbakekallinga er venta å føre til store forstyrringar i flytrafikken.
Dette skjer også under årets travlaste reisehelg i USA, Thanksgiving.
Publisert
28.11.2025, kl. 20.05
Oppdatert
29.11.2025, kl. 05.55