Saka oppsummert:
– Det er meldt kraftig snøfokk i fjellområda i Sør-Noreg fredag, spesielt over Hardangervidda, Vikafjell, Strynefjell og Dovrefjell.
– Store mengder snø har kome gjennom natta, og meir snø er venta utover dagen og kvelden.
– Redusert sikt og glatt føre gjer fjellovergangane krevjande for bilistar.
– Statens vegvesen oppfordrar til å køyre «mjukt», halde god avstand og unngå forbikøyringar.
– Målet er å sikre trygg ferdsel på det som er ein av dei travlaste utfartsdagane i juleferien.
Oppsummeringa er laga av ei KI-teneste frå OpenAI. Innhaldet er kvalitetssikra av NRK sine journalistar før publisering.
Det er meldt kraftig snøfokk i fjellområda i Sør-Noreg fredag.
Faren auka seint torsdag og varer til fredag ettermiddag på den første utfartsdagen i juleferien.
Det er særleg fjellovergangane over Hardangervidda, Vikafjell, Strynefjell og Dovrefjell som blir ramma av snøfokk, opplyser vakthavande meteorolog Haldis Berge til NTB.
– Det har komme mykje snø gjennom natta, og på morgonen fredag er det også meldt store mengder over snøgrensa som ligg mellom 900 og 111 meter, seier ho.
– Vi ventar at det blir litt mindre nedbør gjennom dagen, men det er mogleg det kjem tilbake i løpet av kvelden.
Slik ser nokre av fjellovergangane ut fredag morgon:
– Køyr mjukt
Redusert sikt og snø som pakkar seg i vegen, gjer at Statens vegvesen oppfordrar folk som skal over fjellovergangane til å køyre varsamt.
– Det viktigaste er å komme trygt fram, seier avdelingsdirektør Kurt Jomar Breistrand ved Vegtrafikksentralen.
– Køyr mjukt, hald avstand til bilen framfor, og ver førebudd på at det kan vere glatt. Forbikøyringar har sjeldan noko for seg på dagar med stor trafikk.
Store mengder snø har kome gjennom natta, og meir snø er venta utover dagen og kvelden.
Foto: NTB
18.555 reisande på Flesland
Også på flyplassane i landet er fredag rekna som starten på juleferieutfluktene, og Avinor anslår at totalt 2,2 millionar passasjerar skal reise gjennom Avinors flyplassar i løpet av juleferien.
Berre på Flesland er det venta 18.555 reisande på fredag, som gjer det til den travlaste dagen i ferien.
– Aller flest reiser til ulike destinasjonar i Noreg, men med moglegheit for over to veker fri, ser vi at Danmark, Storbritannia, Spania, Nederland og Tyskland blir øvst plasserte blant favorittane denne jula, opplyser Thorgeir Landevaag, konserndirektør med ansvar for flyplassane i Oslo, Bergen, Trondheim og Stavanger, i ei pressemelding.
Berre på Flesland er det venta 18.555 reisande på fredag, som gjer det til den travlaste dagen i ferien.
Foto: Oskar Rennedal / NRK
Publisert
19.12.2025, kl. 06.52