– Å opprette bomstasjonar på den gamle vegen, er feil politikk. Det vil ramme interntrafikken for dei som bur der, seier Alf Erik Andersen i Frp.
Dei høge bomsatsane på ny E39 mellom Kristiansand og Mandal har ført til at mange pendlarar heller har valt å køyre på den gamle vegen.
For å auke trafikken på den nye E39, og dermed auke inntektene til bompengeselskapet, foreslår Vegdirektoratet to tiltak:
- Dei ønsker å opprette to bomstasjonar på den gamle vegen.
- Dei ønsker at bommane på ny E39 skal stå i 19 år, mot 15 år som planlagt.
Ved Grauthellerkrysset vel fleire å køyre ut til høgre på gamlevegen mellom Kristiansand og Mandal, framfor å fortsette rett fram på ny E39.
Foto: Tom-Richard Hanssen Olsen / NRK
Forslaget inneber at ein må køyre gjennom begge bommane på gamle E39 for å bli belasta. Samtidig meiner direktoratet at bommane på ny E39 kan stå i fem år til, for å spreie utgiftene over fleire år.
Dei meiner dette vil gjere det billigare å køyre på den nye vegen, og dyrare å velje den gamle. Dermed vil trafikken på ny og sikker veg auke.
Fædrelandsvennen omtalte Vegdirektoratet sitt forslag først.
Vil redusere bomsatsar
Amalie Gunnufsen (H) etterlyste i november svar frå samferdselsminister Jon-Ivar Nygård om saka.
Ho og partiet meiner lengre nedbetalingstid er det beste valet.
– Nedbetalingstida bør forlengast nok til å redusere prisane for dei som er avhengige av vegen for å komme seg trygt fram.
Amalie Gunnufsen blei vald inn på Stortinget ved valet sist haust. Ho er opptatt av ny og sikker E39. – Dette har tatt for lang tid. Nå er det vinter og farleg føre, seier ho.
Foto: Stortinget / Stortinget
Krev lågare takstar som «gulrot»
Frp og Andersen meiner lågare bomsatsar er vegen å gå.
– Vi ønsker ei gulrot som gjer at trafikken sjølv vel å bruke den nye vegen.
– Det er lågare bomtakstar?
– Det er det einaste formålet for å klare det. Det viktigaste er å få fleire til å bruke nye E39, ein trygg og sikker veg, seier Andersen.
Alf Erik Andersen fryktar fleire slike situasjonar om trafikken på gammal E39 blir oppretthalden. Her frå ei tidlegare hending, da det blei kø i Vatnebakken.
Foto: Per-Kåre Sandbakk / NRK
Skal opp på Stortinget
Frp sitt forslag blei sendt til Stortinget sin transportkomité i november. Dei har behandla saka, og anbefaler ikkje at forslaget blir støtta når Stortinget skal diskutere saka torsdag.
– Den gamle vegen er trafikkfarleg. Det er mange hardt skadde og døydde. Du får trafikkstans og hindring av utrykkingskøyretøy, seier han.
Høgre sitt forslag om lengre nedbetalingstid skal også diskuterast.
– KrF har varsla støtte til forslaget vårt. Frp og Sp har eigne forslag, men vi håpar dei kan vurdere å støtte forslaget vårt subsidiært, seier Gunnufsen.
– Eit nødvendig tiltak
Hans Fredrik Grøvan er leiar for Lister Næringsforening. Han meiner Vegdirektoratet sitt forslag er godt.
– Å forlenge bompengeperioden har mange peika på som eit viktig og godt tiltak. Sidevegsbom blei allereie før utbygginga peika på som eit mogleg tiltak som måtte vurderast for å avgrense lekkasjen frå ny til gammal veg, seier Grøvan.
Han meiner også at forslaget om at ein må køyre gjennom begge bommane vil verne lokaltrafikken.
Hans Fredrik Grøvan meiner Vegdirektoratet sitt tiltak kombinerte med tiltak på gammal E39 som gir betre forhold for dei mjuke trafikantane, kan vere nødvendig for å gi ny trafikksikker E39 meir trafikk.
Foto: Per-Kåre Sandbakk / NRK
Stor restgjeld
Samferdselsdepartementet bad i sommar om ein gjennomgang av finansieringsordninga på strekninga mellom Kristiansand og Mandal.
Bakgrunnen for oppdraget var eittårsvurderinga til bompengeselskapet Ferde, som viser at prosjektet vil sitte igjen med ei restgjeld på 2,3 milliardar kroner etter enda innkrevjingsperiode.
Fylkeskommunen står som garantist for låna til bompengeselskapet.
– Forlenging av nedbetalingstida er i tråd med ønsket vårt. Men det aleine vil ikkje vere nok. Eg meiner det må inn kapital for å senke renter og avdrag, seier fylkesordførar Arne Thomassen (H).
Fylkesordførar Arne Thomassen er glad for at saka nå skal opp i Stortinget.
Foto: Amalie Sande Henden / NRK
Publisert
06.01.2026, kl. 16.12