Den sterke vinden og det gule farevarselet skaper utfordringar på vegane, seier trafikkoperatør Rolf Einar Vågheim til NRK måndag morgon.
Det har gått ein snøskred i Lodalen over vegen, like før Bødalen.
– Vegen er stengt akkurat no. Entreprenør er på veg ut, seier Vågheim til NRK 07.15.
Han har ikkje informasjon per no om kor stort raset er.
Kolonne og stengte vegar
Det er sendt ut gult farevarsel om sterk vind. Mellom anna blei det på Folgefonna i natt målt orkan i kasta med over 50 m/s, melder Hardanger Folkeblad.
Hardangerbrua og Sotrabrua i fare for å stenge på morgonkvisten grunna sterk vind.
Sotrabrua utanfor Bergen står i fare for å stenge måndag morgon grunna sterk vind.
Foto: Webkamera Statens vegvesen
På Hardangerbrua rv. 13 i Ulvik/Eidfjord er det no stiv kuling med sterk kuling i kasta.
Fleire fjellovergangar er råka av vêret.
Rv. 13 Vikafjellet er stengt.
Fv. 50 Hol – Aurland er også stengt.
Over E134 Haukelifjell er det kolonnekøyring.
Det same gjeld for alle køyretøy på riksveg 7 Hardangervidda ved Hol/Eidfjord.
Innstilte ferjer
Det er også fleire innstilte ferjer på Vestlandet.
- Gjermundshamn – Varaldsøy – Årsnes.
- Mortavika-Arsvågen E39- sambandet. To av tre ferjer innstilt. Den siste går til Hanasand i staden for Mortavika på grunn av uvêret.
- Hjellestad – Klokkarvik – Bjelkarøy- Lerøy: Rundtur med avgang klokka 06:05 frå Klokkarvik er innstilt. Ny vurdering klokka 08:00.
- Hurtigbåten mellom Florø og Måløy går ikkje til kai i Smørhamn på morgonkvisten. Det kan verte forseinkingar.
- Ferjesambandet Stårheim-Isane innstilt. Frå Stårheim gjeld dette avgangen 06:00 og 06:45. Frå Isane 06:20 og 07:05, melder Fjord1.
- Hjelmeland, Nesvik og Skipavik er innstilt inntil vidare.
- Båtane til Utsira, Røvær og Feøy innstilt.
- Ferja mellom Lauvik og Oanes er innstilt.
- Over Boknafjorden er anløpa flytta frå Mortavika til Hanasand på grunn av vêrforholda, noko som medfører lengre reisetid. Avgangane på strekninga er også reduserte.
- Skal du til eller frå Kvitsøy, må du nytte ferje, då hurtigbåten er tatt ut av drift.
Flytrafikken råka
Også flytrafikken er råka av den sterke vinden.
Equinor melder om forseinkingar i helikoptertrafikken ut i Nordsjøen grunna utfordrande vêrforhold. Selskapet ber likevel alle passasjerar om å møte opp til vanleg tid.
På grunn av vind og bølgehøgder er dagens turar frå Flesland kansellerte, melder Heliport. Også fleire av turane frå Florø er kansellerte.
På Bergen lufthavn Flesland er fleire fly innstilte.
Foto: Simon Skjelvik Brandseth / NRK
På Flesland er to SAS-avgangar frå Bergen til Stavanger innstilt. Det er også fleire fly som er forsinka.
Fleire fly til Bergen er også innstilt, mellom anna tre fly frå Stavanger.
På Sogndal lufthamn er det så langt registrert to forseinkingar. Dette gjeld flyet til Bergen som skulle ha gått klokka 06.45. Det er utsett til 08.05, ifølge Avinor.
Den same avgangen skulle også ha gått til Florø, men blir utsett til klokka 08.20.
Flyet frå Bergen som skulle landa 08.45 er kansellert.
Frå kystbyen Florø er avgangen til Bergen klokka 09.25 kansellert. Avgangen til Bergen som skulle ha vore i lufta klokka 07.25, er utsett til klokka 10.25.
Vinden skal halde på utover dagen, og Vegtrafikksentralen trur det vil kome inn endå fleire meldingar.
Dei ber folk vere ekstra varsame og følge godt med.
– Sjølv om det er plussgrader, kan det framleis vere glatt, minner trafikkoperatør Rolf Einar Vågheim om.
Her kan du sjekke oppdatert status på vegane.
Vinden vil halde fram utover dagen
Statsmeteorolog Leonidas Tsopouridis seier den sterke vinden vil halde fram.
– No bles det opp i søraustleg liten storm på kysten, full storm utsette stader i fjellet. I fjellområde i indre strøk er det stader som får over 30 meter i sekundet, seier han.
Mellom anna bles det 28–30 meter i sekundet på Kråkenes og Ytterøyane fyr.
– Og det vil halde fram med å blåse utover dagen, til det roar seg i ettermiddag, seier Tsopouridis.
Men utover kvelden vil vinden ta seg opp att med sterk kuling utsette stader.
Farevarsla om svært kraftige vindkast gjer til at BKK har skjerpa beredskapen sin for å ta hand om eventuelle tre eller andre gjenstandar som kan blåse over straumlinjer.
– Dei førebelse vêrvarsla tyder ikkje på like sterk vind som kva vi opplevde under Amy, men vindretninga er den same, seier Henrik Wiedswang Horjen, kommunikasjonsrådgivar i BKK i ei pressemelding.
Publisert
12.01.2026, kl. 07.10
Oppdatert
12.01.2026, kl. 08.32