Eit snøskred sperrar fv. 5723 ved Merkingsgjølet i Lodalen. Skredet blei meldt inn til Vegtrafikksentralen klokka 07:15.
– Skredet har gått over vegen og sperrar for trafikken. Entreprenør er varsla og på veg til staden, seier trafikkoperatør Tor Evensen til Firda.
På fv. 616 mellom Davik og Rugsund skal eit tre ha falle ut i vegbana og hindrar trafikk i eit køyrefelt. Også her er entreprenør varsla og på veg.
Vêrforholda påverkar også ferjesambandet Isane-Stårheim. Fleire avgangar har blitt kansellerte på morgonkvisten, og Evensen ber reisande om å følge med på trafikkmeldingar gjennom dagen.
– Elles gir kraftig vind i kombinasjon med snø krevjande køyreforhold ved fleire fjellovergangar, seier Evensen.
Både Hol-Aurland og Vikafjellet er stengt. Det er også kolonnekøyring over Hardangervidda og Haukelifjell.