Det var ein stor skuffelse å høyre at landets statsminister på riksdekkande TV kunngjorde i forkant av framlegginga av statsbudsjettet for 2026, at regjeringa vil skrinlegge bygginga av Stad skipstunnel.
Men det var dessverre ikkje heilt uventa frå ein distriktsfiendtleg AP-regjering som er meir opptatt av det som skjer utanfor landets grenser og i sentrale austlands område, enn det som skjer her på Vestlandet.
Å komme med denne kunngjeringa før Kystverket er ferdig med å forhandle fram ein endeleg pris med entreprenørane, viser ein statsminister som er både respektlaus og arrogant overfor deltakarane i anbodsprosessen til Stad skipstunnel.
Det er også respektlaust overfor alle i Kystverket og dei lokale kreftene som har jobba for dette prosjektet i mange år.
Stad skipstunnel er det viktigaste prosjektet for å sikre ein sikker ferdsel langs kysten vår i nyare tid og vil sette ein standard for vidare arbeid med å utbetre skipsleia langs heile kysten.
Vi har altfor lenge satsa berre på veg og jernbane i det sentrale austlandsområdet og neglisjert satsinga på ei sikker farlei langs kysten, slik at vi kan få hurtigbåtar som går mellom dei større byane langs heile vestlandskysten, og få ei sikker farlei for fiskeri og oppdrettsnæringa.
Men vi KAN ikkje gi opp Stad skipstunnel no, dette prosjektet må realiserast.
Vi i Frp har ikkje gitt opp håpet om å realisere Stad skipstunnel, og vi er tydelege på at Frp ønsker at anbodsprosessen skal fullførast, slik at vi får på bordet den endelege prisen.
Først då kan vi få eit realistisk bilde over kostnadene og jobbe vidare for å realisere Stad skipstunnel.
Vi forventar at dei andre borgarlege partia sender same signal som Frp og gjer si støtte til realiseringa av Stad skipstunnel som dei lova i valkampen.
«Regjeringa sviktar ein heil landsdel»