Sjølvsagt er han PAOK-supporter, drosjesjåføren som køyrer meg gjennom Thessaloniki.
Dei fleste i byen er det, seier han. Ja, truleg 70 prosent av alle i Nord-Hellas.
Men kva synest han om eigaren vil eg vite? Han som storma banen med pistol etter at ein scoring vart annullert?
– Ein god mann. Han brukte jo ikkje pistolen. Og dessutan var det heilt på sin plass å påpeike at AEK alltid får hjelp frå dommarane, meiner drosjesjåfør Spyridon før han slepp meg av utanfor Toumba stadion.
Savvidis er greskrussisk og har tidlegare sete i Dumaen i Russland. Ifølgje The Guardian har forretningsmannen tette band til Vladimir Putin.
Foto: Sakis Mitrolidis / AFP
Gutedraumen
Dette, ein sliten og nedtagga arena i Hellas nest største by, er altså det Brann-trenar Freyr Alexandersson håpa på då europaligamotstandarane skulle trekkast.
– Dette er ein gutedraum. Det vert ein kamp eg vonar spelarane aldri kjem til å gløyme. Det kjem i alle fall ikkje eg til å gjere, sa islendingen på pressekonferansen før kampen.
Det er ein heilt annan fotballkultur som ventar Brann i kveld. Ein som nok kan bli opplevd som heilt gresk, og for lidenskapelege bergensarar.
PAOK sine supportarar er kjend for å vise begeistring for eige lag med fyrverkeri og baluba. Misnøye med motstandaren kan dei vise med roten fisk, eldspåsetting eller vald.
Dei kan vere så fiendtlege mot motstandarlaget at Toumba har fått tilnamnet «Det svarte helvete».
– Vi har jo fatt litt trening i kva europeisk fotballkultur kan innebere etter kampar i mellom anna Bologna, seier kaptein Fredrik Pallesen Knudsen.
– Men vi har høyrd at det er noko heilt spesielt her. Vi gler oss.
Her trener Brann på Toumba stadion. Torsdag kveld ventar «Det svarte helvete».
Foto: Oddgeir Berland Øystese / NRK
Strenge tryggleikstiltak
– Toumba er ein tøff arena for motstandarane våre. Brann kjem til å få mykje press på seg, sa PAOK-forsvarar Giannis Michailidis til BA dagen før kamp.
Det er venta kring 300 Brann-supportarar på kampen i Hellas nest største by. Dei er tilrådde av gresk politi om å ikkje gå rundt med raudt i byen.
Fire timar før kamp skal dei slusast til stadion, med tung politibeskyttelse. Utan er det sannsynleg at bussane kan bli angripne, er beskjeden.
PAOK sine supportarar gjer at alle kampar vert rekna som høgrisiko her.
– Alle som følger fotball veit at dette er ein unik stadion som kan skape ein unik stemning, seier Freyr Alexandersson.
Foto: Oddgeir Berland Øystese / NRK
I 2012 braut det ut kampar mellom heimepublikum og supportarar frå Rapid Wien inne på Toumba.
Slikt er vanleg når PAOK møter eit av storlaga i Hellas.
Men drosjesjåfør Spyridon meiner Brann-supporterane er trygge i Thessaloniki.
– Jada, dette er ein heilt trygg by. Det kjem til å gå bra. Så lenge dei ikkje gjer noko dumt.
Freyr Alexandersson gler seg i alle fall til koket.
– Alle som følger fotball veit at dette er ein unik stadion som kan skape ein unik stemning. Det vert vanskeleg, men det vert «pisse sjovt».
Før kampen 18.45 i kveld har både Brann og PAOK sju poeng i Europaligaen.
Publisert
27.11.2025, kl. 11.05