– Stavanger. Viking. Eg er her for å bli. Dette er heimen min.
Det seier lyngdølen Zlatko Tripic (32) i ein video fotballklubben Viking har delt på sosiale medium fredag morgon.
Hærføraren og kaptein for klubben som søndag kan sikre sitt første seriegull på 34 år har signert ein ny avtale ut 2027.
– Eg er veldig glad for å forlenge kontrakten. Det betyr mykje for meg å representere Viking, og eg ser fram til å vere med på å bygge vidare på det vi held på med, seier Tripic til Vikings nettside.
Zlatko Tripic jublar under kampen mot HamKam tidlegare i haust, ein kamp Viking vann 3–0.
Foto: Carina Johansen / NTB
Elska og hata
Han er spelaren fansen elskar og motstandarane hatar. Zlatko Tripic har løfta Viking til toppen av norsk fotball.
– Han har vore vanvitig viktig. Eg kallar han for eit positivt dra-til-tryne. Ein sånn spelar har alle lag som vinn noko.
Orda tilhøyrer Ingve Bøe, gullhelt frå 1991 og mangeårig Viking-spaltist i Stavanger Aftenblad.
Viking-siger over Vålerenga heime i Jåttåvågen søndag vil gi stavangerklubben ein etterlengta tittel.
Lyngdølen har blitt ein svært populær spelar blant Viking-fansen.
Foto: Carina Johansen / NTB
Poengspelar
Med sørlendingen Tripic som kaptein har Viking teke store steg og igjen blitt ein etablert gullkandidat.
Lyngdølen var ein nøkkelspelar då det blei opprykk til Eliteserien i 2018, men forsvann til tyrkiske Göztepe etter ein 2019-sesong som blei krona med cupgull.
Han vende «heim» våren 2021, og særleg dei tre siste sesongane har lyngdølen har skilt seg ut som poengkonge og kaptein med stor K.
– Han er jo ein signalspelar på godt og vondt. Han trør til, og han får med seg medspelarar og «fuckar opp» motspelarar, seier Bøe til NTB og held fram:
– Men det viktigaste er at han er involvert i vanvitig mange skåringar og målgjevande pasningar. Det er vel tre sesongar no der han har passert ti og vel så det i både målgjevande og mål, som er nokså unikt i norsk målestokk.
Gode med Tripic – og utan
Bøe har kontroll på statistikken. Dette er fasit for Tripic dei siste tre sesongane (Viking si ligaplassering i parentes):
- 2023 (4): 13 mål og 10 målgjevande pasningar
- 2024 (3): 10 mål og 15 målgjevande pasningar
- 2025 (1): 10 mål og 14 målgjevande pasningar til no
32-åringen med eit av dei beste høgrebeina i ligaen har gått føre, men sjølv då han sona karantene – etter å ha krangla med Rosenborgs Adrian Pereira – klarte Viking å ta poenga som skulle til for å halde presset på Bodø/Glimt.
Publisert
28.11.2025, kl. 10.20
Oppdatert
28.11.2025, kl. 11.18