Om Brattvåg greier å slå østfoldlaget samanlagt etter denne andre kampen, er dei blå og gule klare for førstedivisjon for aller første gong.
Då blir dei i så fall det femte laget frå Møre og Romsdal i toppfotballen for menn neste sesong. Norsk Toppfotball på herresida består av dei to øvste divisjonane, Eliteserien og førstedivisjon.
Mykje folk
Det er venta eit stort publikumsframmøte på Brattvåg stadion. Dette er noko mange vil ha med seg, og det kjem nok også mange supporterar som heiar på Moss.
Brattvåg tapte 2–1 for Moss i den første kvalifiseringskampen førre helg.
Brattvågspelar Emil Dahle seier til NRK at det blir ein tøff kamp laurdag.
– Det er eit godt lag vi møter. Vi må vere på vårt aller beste for å få det til, seier Dahle.
Emil Dahle og dei andre Brattvåg-spelarane spelar for eit historisk opprykk laurdag.
Foto: Øyvind Berge Sæbjørnsen / NRK
Neste år har Møre og Romsdal:
- Kristiansund og Molde i Eliteserien.
- Aalesund i Eliteserien eller førstedivisjon. Dei spelar kvalifiseringskamp for opprykk til Eliteserien søndag mot Kongsvinger.
- Hødd held fram i førstedivisjon, der dei i år kom på ein tiandeplass. Ulsteinvikarane får neste år Brattvåg som motstandarar i førstedivisjon, dersom laget frå Haram greier å rykke opp.
Opprykkskampen mellom Brattvåg og Moss laurdag startar klokka 13, og på NRK sine nettsider kan du følge dramaet frå minutt til minutt.
Publisert
29.11.2025, kl. 08.31
Oppdatert
29.11.2025, kl. 12.49